حكومة في خدمة الشعب

بقلم الزين عثمان محمد احمد

صباح جديد وشروق أخر لشمس البلاد المحبة الخميس نهاية اسبوع مع ذات القصة القديمة ديك البلد دي ما عندها حلقة والسيناريو عادي ممكن تمد حلقاته بالحوار ولو ما كمل تاني اعمل حوار المافي شنو .
صباح النشيد وصباحة الراية خفاقة وبتكيل العين صباح المدارس المغلقة والصوت الذي لا يزال صداه هناك عند الثامنة بتوقيت الطابور “نحن جند الله جند الوطن” وصباح الوطن الذي هو هزيمتنا وفي نفس الوقت هو انتصارنا صباح الناس المتمسكة بحلمها ان هذه الارض ستكون مكان صالح للحياة وهذه البلد سيأت عليه يوم تكون هي في الخارج تشبه تماماً وجودها في دواخل من يعشقونها صباح الخير علي الجميع ودون فرز صباح الخير علي الزهجان وصباح الخير علي البضحك فرحان وصباح العطبراوي والنشيد “مواكب ما بتتراجع تاني وصباحاً علي الذي صار في كل الدنيا يملك صفة كونه سوداني
صباح اخر من صباحات الهاشتاق الطول شديد صباح الحلم الذي كلما قلنا انه اقترب ابتعد صباح الاربعة كلمات “حكومة في خدمة الشعب” صباح علي من يبحث عن الشفاء في مستشفى السلاح الطبي صباح الهياكل الما عملوها صباح البرلمان المغلق وصباح المفوضيات الما في وصباح علي رئيس الوزراء الغائب هذا الصباح يعني في زول ما عارف اننا كنا بنفتش علي حكومة تقدم خدمتها للشعب وانتهي بينا الحال نفتش علي الحكومة نفسها ودي عشان نلقاها مفروض نشوف نتائج الحوار البدا امبارح المهم لو في زول عاوز اجابة علي سؤال كيف يمضي الانتقال قول ليهو العربية دي واقفة من شهر عشرة
صباحات الحوار الماشي معانا من الاربعاء للخميس أي ح نحكي القصة البدات في روتانا سلام امبارح وانعقدت الجلسة الأولي للحوار الذي ترعاه الألية الثلاثية الأمم المتحدة والاتحاد الافريقي والايقاد … شفت شعار حرية سلام وعدالة وصل وين باقي القصة ما اظن في زول ما شاف الصور في قاعة الاجتماع أمس حيث ارتدت الاغلبية بدل بلون بلو المهم لو قلنا نختصر القصة دي في عبارة واحدة ح تكون (وثبة) البشير تعود بعد ان اسقطه الشعب
في اول جلسات الحوار راينا حقيقة الزول البقلب السمكة وهو ما دافع الشيرنق او الزول الكان موجود في صاج السلطة التي هتف الشعب كله في وجهها تسقط بس معظم من اسقطناهم بالباب عادوا أمس بالشباك كل الذين كانوا في قاعة البشير انتقلوا أمس لقاعة “فولكر” وكان عدد الحاضرين 6 كيانات سياسية اضافة للمكون العسكري الذي كان جزء من منظومة المخلوع الأمنية التجاني سيسي كان رئيس السلطة الانتقالية بدارفور ميادة سوار الدهب كان وزيرة بحكومة ولاية الخرطوم الصادق الهادي المهدي كان وزير لخمس وزارات مناوي كبير مساعدين والاتحادي الاصل والشعبي حين سقطت خيمة الانقاذ كانوا جالسين تحتها
في الجلسة الافتتاحية يقول ود لباد ان الحوار بطريقته دي لن يقود الي نتيجة وما قاله ود لباد اكد عليه بيان الألية في وقت لاحق غياب القوى المؤثرة على الشارع لن يجعل الحوار ينجح لا حوار دون المجلس المركزي وهو في حوار يمكن ان ينجح في تحقيق الاهداف في غياب اولاد الحلة تقرا لجان المقاومة والقوى المدنية الرافضة للانقلاب ما جري بالامس أكد على حقيقة ان من انجزوا قرارات اصلاح المسار يحاورون انفسهم للبحث عن مسار للمخارجة من كانوا هناك كانوا علي قلب رجل واحد بل ان ما حدث يشبه قصة ذلك الذي ذهب لخطوبة ابن عمه واهله مصرين علي التعارف شفت كيف
هذا الصباح وبعد الحوار يخبركم ديسمبري ده ما اصلاح مسار دي قراية من الكتاب القديم ذاتو ومحاولة لاقتراع العجلة فلا يمكن تصور ان تقيم حواراً بين ناس اصلاً ما في بيناتهم مشكلة يعني هسه في مشكلة بين مبارك اردول والمكون العسكري ولا في مشكلة بين جبريل وبقية الحاضرين يا عمك دة نفس الدواء بس شركة تانية ما في زول بيرفض الحوار لكن بعض الموضوعية لا تضر والبلد دي تاني ما بترجع وراء ولو سمع من يديرون الحوار النصيحة بدل تخسروا قروش وتتعبوا من الاجتماعات زول يقول لكمال عمر الحضر الحوار الفات يجيب المخرجات وفي النهاية ح تصلوا لنفس النتيجة سينتصر هذا الجيل لسودانه الذي يحلم به
هذا الصباح ثمة ما يفرح ما تخربه جلسات السلام روتانا في حوار نعاه من دعي اليه يصلحه استاد الهلال السودان انتصر صقور الجديان فريقنا القومي تحلق بشعبها في سماوات من الحبور فوز السودان علي الكونغو في استاد الهلال بهدفين لهدف أمس لم يكن مجرد فوز في مباراة لكرة القدم كان بمثابة نقل اهل البلاد الموجوعة الي رحاب الفرح وقتها نسي الجميع كل الازمات الغاز القاطع والكهرباء المبرمجة الموية المافي نسوا اختلافات الساسة التي لا تنتهي نسوا فيها قانون الطوارئ ورائحة البمبان في الشوارع نسوا كل ما يفرقهم واجتمعوا فقط علي السودان المنتصر وصفقوا ل 11 رجل انشدوا نحن جند الله جند الوطن ونجضوا شغلتهم بان جعلوا الراية ترفرف بالنصر شكراً صقور الجديان
بالعود للهاشتاق الليلة الخميس يوم الموكب سيعود الديسمبريون ليرفعوا راية الشهداء وليؤكدوا علي انهم لن يعودوا من منتصف الطريق يعرفون انه ملئ بالاشواك المتاريس البمبان وربما الرصاص لكنهم سيمضون ولن يعودوا من منتصف الطريق ففي أخر النفق ضوء يشع بنور سودان الحرية السلام والعدالة في أخر النفق الممتلئ بالجثث ثمة أمنية ترددها ام أنشاء الله ما نفقد نفر تعودوا غانمين ويسلم بيكم الوطن

لمزيد من المفالات إضغط علي الرابط

https://hala96.com/category/news/

#أسمعنا_بقلبك | #هلا٩٦ |#بصوتك_قادر | #السودان | #Sudan |#أسمعنا_وسمعنا_صوتك | #Hala96Fm