نفير

صباح جديد شروق أخر لشمس السودان في وطن قديم , صباح الموية النموت أن جاءت من السماء ونموت إن غابت عن المواسير . صباح الطين والخبّوب , صباح الخرطوم التي سقطت في الامتحان من أول مطرة صباح النشيد داك “شدي حيلك يا قطاطي و يا بيوت الطين اقيفي “

صباح الخريف ومعه نشيد الحسرة “الحِيطة وكتين الـ تقع تقع ألفِ وجعة على الضُلعْ “

صباح الخريف والأمنيات بأن تكون أمطار خير وبركة صباح الخير على أي زول بزح سلك الكهرباء من الشارع عشان ما يتسبب في وفاة زول وصباح الخير على الزول البيكمل رصيدو في تلفونات طوارئ الكهرباء عشان يجو يعالجوا المشكلة وصباح الخير على ناس الكهرباء لما يستجيبوا , صباح الخير على البساعد في جاره شان يصرف الموية من الحوش وصباح الخير على أي زول بيصرف موية بيته بدون ما يكون على حساب الجيران وما صباح الخير 10 مرات على مسؤول بيقول لينا فاجأني الخريف ما صباح الخير على حكومة بتقفل الكباري وعاجزة عن فتح المصارف

صباح اخر من صباحات الهاشتاق حكومة في خدمة الشعب ويعني في زول ما عارف هسه نحنا لو غرقنا ما بنكون عارفين وزير الري منو ولو جاتنا ملاريات الخريف ما بنكون عارفين وزير الصحة منو . ولو الزلط اتقطع ما بنكون عارفين لا أسم وزير النقل ولا اسم وزير البني التحتية . هذا الصباح نزل المطر وما تزال أبواب البرلمان مغلقة جاءت المطرة وم ح نلقي رئيس وزراء عشان يخوض الطين مع الغرقانين نزلت رحمة السماء وما تزال العدالة محلك سر وأمهات الشهداء في انتظار رحمة الإنصاف

هذا الصباح لو سألوك كيف يمضي الانتقال قول ليهم يمضي بتعريف أن السودان سلة مواثيق العالم ومبادراته التي لا تنتهي . يمضي الأنتقال بأن من أصلحوا المسار وما اتصلح عاوزين يصلحوا تاني وأن ذات من انقلبوا على وثيقة الانتقال بيكتبوا في وثيقة جديدة وهكذ

ا
هذا الصباح اللجنة التسيرية لنقابة المحامين نظمت ورشة حول الإعداد للإعلان الدستوري الانتقالي الذي يحكم الفترة الانتقالية ويؤسس للمبادئ الدستورية، و بمشاركة عدد من القوى السياسية والمنظمات الدولية ومنظمات المجتمع المدني ولجان المقاومة والقضاء العسكري التابع للقوات المسلحة. ومشاركة قيادات قوى الحرية والتغيير “المجلس المركزي” والسفراء المعتمدين وعلى رأسهم السفير السعودي والإماراتي والمبعوث فولكر . القصة ما في الورشة القصة أن مخرجات اليوم الأول تم اختصارها في “فولكر والسفير السعودي والسفير الإماراتي جو دار المحامين وما مشوا أم ضواً بان” وكأنما علاج المشكلات التي تصنعها النخبة يتم بحضور من يرعون مصالح منظماتهم ودولهم ؟

وزي ما قالت الديسمبرية “يا جماعة عليكم الله أرتقو لمستوى المسؤولية بس , الثورة دي حقتنا ونحن بنعرف نحرسها كيف

”
هذا الصباح الخريف يضرب بقوة البيوت تنهار في الجزيرة والسيول تجتاح حي المسيد في بربر والخرطوم صارت مدينة “البندقية” الغارقة في شبر موية توقف حركة المرور وسقوط السيارات في الوحل في نص الزلط ولا جديد فقط هي قفصة كل خريف يبدأ بإعلان الحكومة استعدادها له وبنتهي ب “نفير” وبدعم بجي من الخارج ويتسرب إلى الأسواق ياخ نحنا عاوزين حكومة نحارب بيها الخريف أو حكومة تجعل الخريف نعمة وليس نقمة وعلى السيرة قاليك تمويل الموسم الزراعي في القضارف ينخفض إلى 52% مقارنة بالموسم السابق الحكومة دي ما بتقرا تقارير المنظمات البتقول البلد داخلة على مجاعة ؟

وهذا الصباح ثمة فيلم “هندي” عديل بطلة الطفل المخطوف الطفل المُختطف مزمل كامل العاص، الذي تم العثور عليه صباح أمس في قرية عووضة بين ولايتي الجزيرة وسنار .

وكشف والد الطفل معلومات تفصيلية مثيرة عن واقعة الاختطاف، حيث أشار إلى أنها مرتبطة بإحدى عصابات (9 طويلة) التي سبق وأن اعتدت على الشقيق الأكبر للطفل المختطف قبل شهرين. حيث قاوم مجموعة 9 طويلة حاولت نهبه وأصاب أحد أفرادها في عينه وقالوا ليه ح نجيك راجعين وفعلاً جو خطفوا شقيقه الصغير يعني 9 طويلة عملوا تصحيح مسار من خطف التلفونات لخطف الأطفال

هذا الصباح شكلة قديمة متجددة في صفوف الحركة الشعبية قيادة عقار التي كتبت بيان الصباح قالت فيه أن لا علاقة لها باجتماعات المجلس المركزي ومن يجتمعون يمثلون أنفسهم لا الحركة التي يجلس رئيسها في المجلس السيادي الما قاعد يجتمع . المهم نص النهار عرمان ومجموعته أصدروا بيان قالوا فيه إن الحركة جزءٌ أصيلٌ من قوى الثورة السودانية، وإنها من المؤسسين لقوى الحرية والتغيير 2019، وأحد الموقعين على إعلان قاعة الصداقة في أغسطس الماضي

.
وأكمل البيان ان الشعبية ستظل مع الشارع السوداني المناهض للانقلاب أمس واليوم ولا حياد في الاختيار بين الجماهير والشارع والانقلاب، وأنها ستستمر في مقاومة الانقلاب وفي العملية السياسية التي تؤدي إلى سلطة مدنية ديمقراطية . المهم أي محاولة منك للفهم هنا كيف حركة يكون نصها انقلابي ونصها التاني مقاوم ؟ تتحمل انت مسؤوليتها

بالعودة للهاشتاق .. هذا الشعب سيفعلها زي كل مرة ح ينتصر على الخريف والسيول وح يقيف ترس يشد سواعد بعض وح يمشي أكتر من كدة ح يتحول نفسه ل سيل هادر من أجل تحقيق أهداف ثورته لن تهزمه نخبة الداخل ولا تربص الخارج وسيشرق علينا صباح ما نكون مضطرين عشان نلقى حكومة في خدمة الشعب نعمل هاشتاق

لمزيد من المفالات إضغط علي الرابط

مقالات ساخنه Hala 96FM

#أسمعنا_بقلبك | #هلا٩٦ |#بصوتك_قادر | #السودان | #Sudan |#أسمعنا_وسمعنا_صوتك | #Hala96Fm #حكومةفي خدمة_الشعب