تعيش أنت ويدوم خيرك

صباح جديد . وزي كل يوم شرقت شمس السودان وشرقتنا في البلد المحبة الخميس نهاية الأسبوع وذات النص القديم مع الوطن تبقى المحبة .
يبقى السودان الأول في القلب وإن فرض علينا البقاء لحين السداد وعبارة قديم كنا نقرأها في كراسات المدارس “وللأوطان في دم كل حر يد سلفت ودين مستحق” مدينين نحن للسودان بقيمة كونه منحنا وثيقة الانتماء له طالبنا دين موية النيل والهواء العليل طالبنا دين كوننا نتوشح الجلابية بياضاً طالبنا كتير هذا السودان وليت نستطيع دفع الفاتورة
صباح الخير على البلد وصباح الخير على ناس البلد صباح الخير على من يمنحهم الغرق في الفيافي البعيدة ويمنحون بعضهم الابتسامة صباح الخير على ناس المناقل في قلب الجزيرة وعلى قرى القاش التي انقطع الوصل بين أهلها صباح الخير على ناس الجنينة يتبادلون السلام لا الموت صباح الخير على المضربين في الميناء وعلى الناس في كل مكان
صباح الخير على النجار وعلى الفران وعلى الميكانيكي صباح الخير على السباك وعلى الطلبة صباح الخير على السواق والكمساري وعلى الموظفات بثيابهنّ البيضاء .
صباح الخير على أستاذ الرياضيات يعلمنا أن واحد الواجب زائد واحد الحق يساوى اثنين العدالة صحيحة وما صباح الخير على أي زول يأكل حق الأساتذة 30 مرة
صباح أخر من صباحات هاشتاقنا “حكومة في خدمة الشعب” وصباح جديد من صباحات هاشتاقهم ” شعب لتوفير الرفاهية لمسؤولين في حكومة لم يتم تشكيلها بعد .
أما بعد فلا جديد أبواب البرلمان مغلقة مجلس الوزراء لا يزال في رحلة البحث عن رئيس العدالة في ذات مكانها , الإنصاف لم يتحرك ولا خطوة للأمام بالنسبة لهياكل إكمال الانتقال مافي حاجة جديدة غير ممكن تردد في ذكرى توقيع الوثيقة “تعيش انت ويدوم خيرك”
هذا الصباح في الاجابة على سؤال كيف يمضي الانتقال أخبرهم ” حركات حركات” وسيارة إصلاح مسار راجعة لورا وممكن في أي لحظة البنزين يقطع .
هذا الصباح سنكرر جملة سبق وأن رددناها هنا “السودان ده أمتحان” وحتى في امتحانات السودان ثمة سقوط بل صعب حتي انك تجيب “الباص”
القصة احتج مصححو مادة الرياضيات على العائد المادي الذي ينالوه ووعدهم الوزير بتنفيذ مطالبهم لكنه لم يلتزم بما تم الاتفاق عليه . القصة ما انتهت هنا . لجنة المعلمين قالت الوزارة قررت تأخذ الأوراق غير المصححة من مركز التصحيح . شفت كيف . ما تسأل اها ح تعمل شنو فيها ؟ عادي ممكن بتتطبيق نظرية المروحة ويتم وضع الدرجات . غايتو البلد دي الجاتا تختاها .
هذا الصباح وفي سودان التناقض عادي ممكن يجيك خبر لقاء بين المبعوث فولكر ورئيس مبادرة نداء السودان الشيخ الجد وانت امبارح القريبة دي كاتب خبر مخرجات المبادرة وعلى رأسها المطالبة بطرد “فولكر” المهم في ديسمبري قال يمكن يكون لقاء في شكل حفل وداع ويكمل يا جماعة الما بتقدروا عليه ما تقولوه وخليكم عارفين نحنا ذاتنا ما في حالة أزمة تعالج بمبادرات نحنا في واقع ثورة يجب تنفيذ مطالبها في الحرية والسلام والعدالة وعدم عودة النظام السقطناه 10 مرات
هذا الصباح يخبركم حزب المؤتمر السوداني عن وجهته السياسية محدداً وبشكل قاطع إسقاط الانقلاب يعني بالعربي البسيط تسوية ما في الحزب قال أن هذا الموقف هو أيضاً موقف قوى الحرية والتغيير “المجلس المركزي” هذا الصباح مذكرة انشقاق وشيك في صفوف حركة مالك عقار بسبب تباين المواقف بين دعم الانقلاب ودعم خيارات الشارع في مواجهته . بينما يحذركم منبر المجتمع المدني في دارفور عن انزلاق وشيك للاقليم في أتون الفوضى بسبب انتشار السلاح ولو سألوك كيف أخبرهم “السلام سمح” بس ما جاء عبر اتفاقية جوبا
وفي صباحات الموت 75 سوداني ماتوا جراء السيول والفيضانات هذا هو المبتدأ بينما الخبر الثابت هو أن الحكومة ما مشغولة بشعبها يموت بالسيل تنقلب بيه عربية تضربه كهرباء في الشارع وتقطع جوة البيت يموت لعدم وجود الدواء الخاص بمرضى السرطان تعترضه رصاصة طائشة في موكب . تبتلعه أسماك القرش في المحيطات يا جماعة نحنا عاوزين نعيش والله سئمنا من القصص دي
وصباح الخميس ما بنتهي المهم الحكومة قالت ليكم الخبر الخاص بأنها ألزمت شركات استيراد الوقود ببيع الوقود بسعر أعلى ما صحيح دي حركات وسائط تواصل اجتماعي ساكت الحكومة ما ممكن تعمل كدة . وعلى سيرة الوقود والقروش قالوا الألف جنيه ح يغيروها وح يزيدوا من ضمانات سلامتها ضد التزوير وقبل نغادر خبر الوفد السافر روسيا بقروش دافع الضرائب شنو والمفاوضات مع روسيا ح نطلع منها بشنو لمصلحة السودان وشعبه ؟
بالعودة للهاشتاق . الخميس الموكب , واحتمالية كبيرة فأن يتم إغلاق كبري المك نمر شارع المطار هو المسار الجديد لمن قرروا الاستمرار في قول لا قرروا المواصلة في مسيرة الثورة بدون تراجع
قرروا الخروج تحت حراسة دعوات الأمهات “انشاء الله ما تنقصوا نفر وينتم بيكم فرح البلد” قرروا الخروج غير آبهين بمن باع موقفه قرروا مرة أخري دفع فاتورة شراء حلم الشهداء ومعه حتماً سودان بكرة الفيهو الحرية تمشي نحو العدالة وبسلام

لمزيد من المفالات إضغط علي الرابط

مقالات ساخنه Hala 96FM

#أسمعنا_بقلبك | #هلا٩٦ |#بصوتك_قادر | #السودان | #Sudan |#أسمعنا_وسمعنا_صوتك | #Hala96Fm #حكومةفي خدمة_الشعب