مقالات ساخنه

حكومة في خدمة الشعب الاحد ١٢/٦

todayJune 12, 2022 31 1

Background
share close

حكومة في خدمة الشعب
الاحد  ١٢/٦

بقلم الزين عثمان محمد احمد

صباح جديد وطن قديم شروق أخر لشمس السودان الحراقة واسبوع أخر نفتح عداد أيامه بالحب لهذه البلاد ولشعب البلاد وللناس الواجعهم وجع البلد، وحقيقة واحدة هذا السودان لو لم نجده لاخترعناه وعلى طريقتنا و لأعدنا تعريفه.. السودان هو الوطن والمكان الذي لا يبلغ فيه مواطن من الثراء القدر الذي يمكنه من شراء مواطن آخر ولا يبلغ فيه مواطن من الفقر ما يجعله مضطراً أن يبيع نفسه وكرامته.. السودان هو أن نعيش بعزة وكرامة.. وصباح الخير عليكم كلكم صباح الخير، علي الثورة والثوار، صباح الخير على أي زول منجض شغلته ولا صباح على أي زول منجض الشعب في النيران….
صباح أخر من صباحات الهاشتاق ان حكومة في خدمة الشعب.. صباح جديد لم نصل فيه الى الحلم بعد ولكننا لن نجعله يسقط.. صباح اخر والهياكل ما في، صباح جديد ولا برلمان ولا نواب يقولون ان الشعب يريد، صباح آخر ولا رئيس وزراء، صباح تاني وحتي الوثيقة ديك المكتوب فيها تحقيق أهداف الثورة في الحرية والسلام والعدالة مزقوها، انتظرنا تجينا هياكل وننتقل ببلدنا الى حيث المكان الذي يليق بها ادونا ثمن ثورتنا انقلاب وبالباقي بخور تيمان شان نولع البخور في القاعة، انتظار لجولة جديدة من الحوار وهكذا يمضي الانتقال.
صباح الحوار ، صباح القصة القديمة ديك برضو ده يزعل ده يزعل ده يرضي البهناك، نجيب ناس المجلس المركزي يزعلوا بتوع الوفاق، يمشوا ناس القصر يجيبوا ذات الناس الكانوا في القصر لما كان حاكم البلد المخلوع بثورة شعب كان شعارها تسقط بس… صباح الآلية (فولكر وود لباد) ومعاهم السلام روتانا ودار حزب الامة، صباح السهر ياخ بعد 3 سنة من الثورة رجعنا تاني للسهر بسبب حوار قوى التغيير والمجلس العسكري ياخ هرمنا عديل ما هو ما ممكن عمرنا كله نضيعه في انتظار نتائج لجان تحقيق لن تعلن ومتابعة حوار المدنيين العسكر الذي ينتهي باتفاق لا يستمر طويلاً.
هذا الصباح علينا اخباركم بأن الألية الثلاثية قررت تجميد حوار (روتانا) الي حين اشعار اخر ومحتاجين نرجع عشان نقول ليكم انه حوار روتانا كان نسخة أخري من حوار وثبة المخلوع وهو الحوار الذي اعترفت الآلية بأنه لن يساهم في حل المعضلة السياسية في البلاد.. ان تتوقف مشاهد روتانا والسيناريوهات المعادة أمر يجد الترحيب لكن ما يريده السودانيون حقاً إنهاء حالة الفراغ الراهن ومعه إنهاء محاولات السيطرة علي ثورة من دفعوا دمائهم فيها، ما قالوا عاوزين سلطة وإنما اعلنوها نريد سودا ن للحرية السلام والعدالة، مطالب واضحة ولا تحتاج لاعادة شرح وتفسير..

ياخ نحنا ما عملنا ثورة عشان يحدد مصير شعبنا الاخرين.. قصة مبعوث طالع ومبعوث نازل دي حركة ما كيوت زيها وأنه قيادي كبير يقول ليك نحنا قعدنا مع العساكر شان خاطر عيون أمريكا والسعودية ، وخاطر الشعب ما عنده خاطر؟ خاطر الامهات المكسور خاطر الرفاق وهم يدفنون 101 شهيد؟ الشعب يريد نخبة تحركها اوجاعه وليس أوامر ناس برة.
في صباح ثاني من امتحانات الشهادة السودانية ثمة حقيقة واحدة الامتحان في السودان ده السودان ذاته والسؤال ليس ذلك السؤال المثير للجدل بتاع هل بخور التيمان بطرد الشيطان، السؤال هو ليه الاتصالات بتقطع الانترنت عشان الناس تمتحن وهو مش في قرار قضائي بعدم قطع الخدمة؟ وهي مش الخدمة دي نحنا دافعين قروشها مقدماً والشركات كل يوم بتزيد سعرها ؟ سؤال الانترنت المقطوع طوالي بيقودك لسؤال النائب العام صاحب قرار القطع هو الحصل شنو في 101 شهيد ؟ والسؤال الأكثر مرارة هو ذلك المتعلق بغياب 23 طالباً عن أداء الامتحان ما عشان ما دفعوا الرسوم لا غابوا لان رصاصات الموت قطعت عليهم الطريق نحو قاعات الامتحان استشهدوا في مواكب رفض الانقلاب ودعم الثورة أو لم نخبركم ان امتحان هذا السودان هو السودان نفسه
في صباح الغرق مرهق الزول في شرق السودان مرهق كل السودان بالأخبار التي تأتي من هناك الموت الحريق التتريس الإغلاق الاستقالات وسحبها واخر خبر هو غرق باخرة أمس على رصيف ميناء سواكن تحمل في داخلها 15 ألف رأس من الماشية بالمناسبة الحصل شنو في لجنة تحقيق الحريق الذي قضى على الطبالي في ذات الميناء ؟ من بورتسودان يخبركم مدير الشركة السودانية للموارد المعدنية الأمين العام لتحالف قوى الحرية والتغيير (الميثاق الوطني) مبارك بضرورة أن يضم فولكر المجلس الأعلى لنظارات البجة في الحوار ويكمل ان من حق البجا التمتع بالسلطة في السودان ونقول نحن من حق الجميع ان ينال حقه في السلطة لكن من تحت راية كونه سوداني
هذا الصباح خلونا نحكي قصة حل مجلس الاساتذة بجامعة الخرطوم الذي تم بواسطة قرار من رئيس مجلس السيادة قام الدكتور عطا البطحاني تقدم بطعن في القرار لدى المحكمة العليا ليصدر القرار من مولانا تاج الأصفياء خليل بشطب العريضة والسبب أنه لم يصدر قرار من رئيس مجلس السيادة بحل مجلس اساتذة جامعة الخرطوم شف كيف ياخ علي قول زول ساي البلد دي ماشة بالبركة وعلى سيرة البركة ورونا المبروك الحاكمنا بس
بالعودة للهاشتاق الشعب بقول ليكم الحوار ما كعب كعب الحوار الما بعالج القضايا الحوار الذي لا يقود لتحقيق سودان الحرية السلام والعدالة ببقي طق حنك لا قيمة له وذات الشعب يخبركم التسوية ما كعبة كعبة التسوية التي تعجز من ان تمنح امهات الشهداء ورفاقهم العدالة التسوية التي تحاول تجاوز الدماء التي تم سفكها لن تحقق استقراراً

لمزيد من المفالات إضغط علي الرابط

https://hala96.com/category/news/

#أسمعنا_بقلبك | #هلا٩٦ |#بصوتك_قادر | #السودان | #Sudan |#أسمعنا_وسمعنا_صوتك | #Hala96Fm

Written by: adminhala

Rate it

Previous post

مقالات ساخنه

حكومه في خدمة الشعب

حكومة في خدمة الشعب بقلم الزين عثمان محمد احمد صباح جديد وشروق أخر لشمس البلاد المحبة الخميس نهاية اسبوع مع ذات القصة القديمة ديك البلد دي ما عندها حلقة والسيناريو عادي ممكن تمد حلقاته بالحوار ولو ما كمل تاني اعمل حوار المافي شنو . صباح النشيد وصباحة الراية خفاقة وبتكيل العين صباح المدارس المغلقة والصوت الذي لا يزال صداه هناك عند الثامنة بتوقيت الطابور "نحن جند الله جند الوطن" وصباح […]

todayJune 10, 2022 40


Similar posts

مقالات ساخنه

حكومة في خدمة الشعب – حنبنيهو

حنبنيهو صباح جديد , شروق أخر لشمس السودان الوطن وهو بالتأكيد ليس فندقاً نغادره حين تسوء الخدمة الوطن مكان تنتهي عنده كل محاولاتك للهروب وطالما أنك قاعد قاعد فأحسن نبقي شان نبنيهو . بداية أسبوع مع ذات النشيد هذه الأرض لنا ونشيد أخر ح نبنيهو بنحلم بيهو يوماتى وطن شامخ […]

todaySeptember 18, 2022 23 3

Post comments (0)

Leave a reply

Your email address will not be published. Required fields are marked *

0%