مقالات ساخنه

حكومة في خدمة الشعب – احلام الوطن المقلوب

todaySeptember 18, 2022 4 3

Background
share close

احلام الوطن المقلوب

صباح جديد , شروق أخر لشمس البلاد وسودان للمحبة التي لا تنتهي أخر الأسبوع وبداية ما لا يكمل المهم زي كلام كل خميس السودان ده ما عنده حلقة أخيرة حلقات كدة مدورة فوق بعض ومع بعض مسلسل تركي ممكن يبقي مسلسل مكسيكي أو مسلسل هندي من 27 جزء..
صباح الخير علي الراوي صباح الخير على الممثلين صباح الخير على الأبطال وعلى حكاياتهم صباح الخير على شغلهم وعدة الشغل صباح الخير على الأبرول والميكانيكي صباح الخير على الفران ونارو صباح الخير على الأستاذ وقلم التصحيح الأحمر صباح الخير على الجزار وسكينه صباح الخير على الخرفان والراعي الواعي ولا صباح الخير 18 مرة على راعي أخر مسؤولياته خدمة شعبه وما صباح الخير 99 مرة على أي مسؤول ما مسؤول وعامل فيها سيد المسؤولية… صباح أخر من صباحات الهاشتاق حق هلا “حكومة في خدمة الشعب” و أسبوع جديد ينتهي من عمر شعب وظيفته خدمة الحكومة من المهد إلى اللحد صباح لا تزال فيه أبواب البرلمان مغلقة ولا يزال مجلس الوزراء دون رئيس مجلس الوزراء العدالة في إجازة والسلام لا يزال يصنع حروبه ودون توقف…

هذا الصباح في الإجابة على سؤال كيف يمضي الانتقال رد عليهم جبايات جد وضرائب ما عندها حد وأسعار نار كهرباء غير مستقرة الموية “نيلين وعطشانة”…
هذا الصباح سنجيبك على سؤال “هاشتاق” لشنو ؟ قبل 3 سنوات إلا حبة البلد كان باقي ليها “تكة” كدة وتنور قلنا ندفع حقنا في الثورة وندفع حق الثورة علينا نفخنا في الميكروفونات وقلناها كملوا هياكل الانتقال يومها كان في مجلس سيادة بين مدنيين وعساكر في لجنة تفكيك تمكين وفلول يصرخون كان في رئيس وزراء أصبحنا وأمسينا بكلام سمح كان في وزراء واجتماعات مجلس وزراء كان في كورونا وأكرم ياخ كان في وزير مالية وموازنة كان في وزير خارجية وسفر وعلم بلد برفرف كنا ناقصين مفوضيات نائب عام ورئيس قضاء واتفاق على تسمية نواب البرلمان .. و فجاة كدة كلو راح وحدث ما حدث…

هذا الصباح قلنا حكومة في خدمة الشعب شان كنا نرغب في إعادة هيكلة القوات الأمنية كنا نرغب في جيش قومي واحد نغني ليه هذا الجيش لنا نسبقه على الفشقة ولا نتركه وحده في حلايب قلنا حكومة في خدمة الشعب لأجل شرطة في خدمة الشعب وشعب يحترم البوليس لأن في ذلك احترام للقانون .. قلنا حكومة في خدمة الشعب لأجل حكومة تعيد تخطيط المدن والميادين وليست سلطة تعيد تخطيط الشعر في رأس أصحابه…
قلنا حكومة في خدمة الشعب لأجل العدالة وعشان عيون أمهات الشهداء تضوق النصر بعد أن أرهقتها الهزيمة قلنا حكومة في خدمة الشعب لأجل اخبار الشهيد وليد أنه لم يمت واننا في سودان أي زول فيهو بنجض في شغلته . قلنا حكومة من أجل الشعب عشان ما يبقى الحصول على العلاج مرض آخر وعشان ما يجي زول يتاجر في صحتنا وزول يغتني بعد أن ينهب جرعة دواء الصغار… قلنا حكومة في خدمة الشعب عشان الخريف ما يفاجئنا زي كل مرة وعشان المدارس تنفتح أمام الطلاب وليس أمام الهاربين من جحيم صراع الاخوة قلنا حكومة في خدمة الشعب عشان ما تضطر تقيف صف عشان تطلع جوازك أو تجي تلقي الشبكة طاشة
عملنا هاشتاق حكومة في خدمة الشعب من أجل وزارة مالية عندها موازنة نعرف من خلالها اللينا وعلينا تورينا شالت مننا ضرائب قيمتها كم وصرفت على صحتنا وتعليمنا وعلى إعادة تعبيد الطرق كم وزارة نتعامل معاها اخوان ونتحاسب معاها تجار سوينا هاشتاق عشان نلقى وزير مالية يحفظ المال العام ويمنع تصديقات خارج السيستم وعشان ما يجينا وزير مالية يقول لينا انا اديت فلان إعفاء عشان هو إبن أخي هو نحنا قلنا حكومة في خدمة الشعب عشان نتساوى كلنا تحت راية كوننا “مواطنين” سودانيين ما فينا زول أحسن من التاني إلا بمقدار كفاءته وما يقدمه للبلد…

هذا الصباح صدقوا نحنا قلنا هاشتاق حكومة في خدمة الشعب عشان نحضر حفل افتتاح مستشفى الخرطوم ونحضر افتتاح كبرى الدباسين ونشارك في مهرجان افتتاح مطار الخرطوم الدولي الجديد كنا بنحلم نحضر مباراة لفريقنا القومي في المدينة الرياضية قبل نموت , بنكورك حكومة في خدمة الشعب عشان ما نقرأ عليكم خبر بين كل 3 أطفال سودانيين في واحد محروم من الحق في التعليم قلنا حكومة في خدمة الشعب عشان ما نتابع اخبار عن وفيات الأمهات عند الولادة قلنا حكومة في خدمة الشعب عشان مزارعي الجزيرة لما ينتجوا قمح البنك الزراعي يشتريه مننا وما تجي المنظمات عشان تكتب تقارير عن اقتراب المجاعة من شعب دولة هي سلة غذاء العالم
عملنا هاشتاق قبل 3 سنة عشان ما كل يوم نتابع خبر عن مبادرة لحل مشكلات السودانيين ومبادرة رافضة للمبادرة التي تقدمت برؤيتها للحل هاشتاق حكومة في خدمة الشعب كان بس عشان بلدنا تقدم للعالم الحلول وما تكون هي الأزمة هاشتاق عشان ما نكون متابعين أخبار السفير الأمريكي أكثر من متابعتنا لرئيس مجلس السيادة ونهتم بتحركات سفير السعودية أكثر من اهتمامنا بمتابعة أخبار رئيس البرلمان
صرخنا ملء قدرتنا حكومة في خدمة الشعب عشان ما نصل لمرحلة إصلاح المسار ومن بعدها مرحلة البحث عن اصلاح إصلاح المسار الذي لم يصلح حالنا , قلنا حكومة في خدمة الشعب عشان اعتذارنا عن الغياب 30 سنة عن العالم يكون اعتذار صادق يعقبه العمل . حكومة في خدمة الشعب عشان أي مؤسسة تكون عارفة حقوقها وواجباتها وعشان ما يجي فرد يختطفها لصالح مصالحه الذاتية أو الحزبية حكومة لأجل عيون الشعب عشان ما يجي زول يهددنا بساعة الصفر ونكون كلنا الواحد الصحيح في خدمة البلد وشعبه
بالعودة للهاشتاق .. برضو حكومة في خدمة الشعب من أجل أن نجد سودان الثورة حيث تمشي الحرية نحو العدالة وبسلام

لمزيد من المقالات إضغط علي الرابط

مقالات ساخنه Hala 96FM

#أسمعنا_بقلبك | #هلا٩٦ |#بصوتك_قادر | #السودان | #Sudan |#أسمعنا_وسمعنا_صوتك | #Hala96Fm #حكومةفي خدمة_الشعب

Written by: adminhala

Rate it

Previous post

وزارة التربية والتعليم

غرفة الآخبار

الحوري: الفراغ من تصحيح امتحانات الشهادة

وزير التربية والتعليم المكلف محمود الحوري،يؤكد الفراغ من مرحلة تصحيح امتحانات الشهادة الثانوية،، وأضاف : الآن تجري عملية الرصد وجمع درجات الطلاب تمهيداً لإعلان نتيجة آواخر الشهر الجاري،كاشفا مشاركة 1240معلماً من جميع ولايات السودان.   لمزيد من الإخبار إضغط علي الرابط https://hala96.com/category/news/ #أسمعنا_بقلبك | #هلا٩٦ |#بصوتك_قادر | #السودان | #Sudan |#أسمعنا_وسمعنا_صوتك | #Hala96Fm

todaySeptember 13, 2022 9


Similar posts

مقالات ساخنه

حكومة في خدمة الشعب – حنبنيهو

حنبنيهو صباح جديد , شروق أخر لشمس السودان الوطن وهو بالتأكيد ليس فندقاً نغادره حين تسوء الخدمة الوطن مكان تنتهي عنده كل محاولاتك للهروب وطالما أنك قاعد قاعد فأحسن نبقي شان نبنيهو . بداية أسبوع مع ذات النشيد هذه الأرض لنا ونشيد أخر ح نبنيهو بنحلم بيهو يوماتى وطن شامخ […]

todaySeptember 18, 2022 23 3

Post comments (0)

Leave a reply

Your email address will not be published. Required fields are marked *

0%