حكومة في خدمة الشعب 19/6/2022 الأحد

صباح جديد , وشروق أخر لشمس البلاد التي نحب , أسبوع جديد يبدأ عداد أيامه ونحن يأنا نحن خاتين السودان رقم واحد في القلب والروح , وروحنا ذاتا مكركرة من وجع الناس اليوماتي , ومن اسئلتهم حول محبة الوطن ولا إجابة غير أي بنحبها، أنت عندك لينا خيار ثاني غير اننا نحبها؟ نحبها وان كانت مجرد جثة في هذا العالم وعشان نجيكم من الأخر البلد دي بنحبها عشان هي الظلام في آخر النفق وهي نفسها الضوء في ذات أخر النفق…
صباح الأنترنت المقطوع شأن الامتحان وعلى سبيل الذكرى الليلة أمتحان التاريخ في بلد تاريخ حضاراتا ما بشيلو كتاب، يمكنك ان تنسي كل وجع وتتذكر فرحة انك من البلاد التي سدا فيها جدودك في كرري فرقة الموت، انت من بلاد عبد القادر ود حبوبة الذي رفع يده في وجه القاضي الانجليزي مردداً انا سوداني، انت من بلد اللواء الأبيض ومؤتمر الخريجين، انت من بلاد ثورات أهل جبال النوبة، انت من بلد في تاريخها علي دينار.. هنا و يا للأسف التاريخ ناصع البياض هو ما ينسيك سواد الحاضر… صباح الخير على بلدنا وتاريخها ما صباح على أي زول جعل حاضرنا بطعم المرارة و لسه عاوز يسرق المستقبل …

وصباح جديد من صباحات الهاشتاق حكومة في خدمة الشعب .. صباح آخر وما أظن في زول ما عارف أنه لا هياكل عملوها ولا برلمان فتحوا أبوابه ولا عدالة تم تحصيلها والسلام نجماً بعيد ما كملوا الهياكل في فترة الأنتقال واكيد ما كملوها بعد قرارات إصلاح المسار .. هذا الصباح ممكن تقرأه من كراسة امبارح ولا جديد ناس قدام بشاكلوا في الناس في الخلف، الحاكمين بالبلد بسلطة الامر الواقع عاجزين عن الاتفاق على يحكمونا كيف، والعاوزين يسقطوهم سقطوا في الاتفاق على رؤية واحدة وهكذا يمضي الانتقال ومعه عمرنا وعمر الوطن…

هذا الصباح ومع بداية الاسبوع يخبركم “فولكر” القادم من المانيا لأجل تمهيد درب السودان من أجل الانتقال نحو الديمقراطية يخبركم بحسرة قائلاً ” ان 40% من السودانيين يتهددهم خطر المجاعة، أي جوع في ذات البلد التي نغنيها حتى (الطير يجيها جعان من أطراف تقيها شبع) والجوع هو الابن الشرعي للصراعات، يعني بلد يحلوها في الشرق تتربط في الغرب وكل قبيلة شايلة سيفها شأن تقاتل القبيلة الأخرى
والحكومة زي بوليس الفيلم الهندي بتجي بعد ما المنظمات تطلع احصائية بعدد من ماتوا ومن تركوا مزارعهم ومن نزحوا، ما تجينا مجاعة كيف وحاكم الإقليم الزراعي الموقع على اتفاق سلام جوبا ما زال يبحث عن حذائه الضائع، ح تكون في مجاعة بسبب حرب أوكرانيا ومجاعة بسبب ان الحكومة رافضة تشترى إنتاج القمح وتبيع في الذرة، ح تجي مجاعة عشان البنك الزراعي بشتغل في أي حاجة غير الزراعة، وح تجي مجاعة لأن عبارة الزارعنا غير الله يجي يقلعنا ما زالت حاضرة رغم سقوط البشير…

هذا الصباح وبعد ما وصلنا الجامعة تاني رجعنا لسنة أولى ونادي باريس يعلنها لا إعفاء ديون السودان دون العودة لحكم ديمقراطي، العزلة التي غادرناها عدنا إليها بخطى متسارعة وبقت علينا يجمعها حمدوك ويطأها فيل الانقلاب ليترك لنا السؤال أي إصلاح مسار والديون رجعت وما في إعفاء؟
اها في قصة الاقتصاد أعفوا لينا بس مفروض نوريكم أنه وزير المالية قال وللأسف ليس للدولة موارد غير جيوب المواطنين وأظنه ما عارف انه حتى المورد ده جفّ … تقول السيدة التي تعرفونها جيداُ موجهة خطابها للسيد جبريل سيدي الوزير انت عارف الرغيفة بكم والبيت بستهلك كم رغيفة في اليوم ؟ عارف أنه رطل اللبن زاد رغم انه الغارق في سواكن خرفان ما بقر؟ عارف كيلو الكهرباء القاطعة بقي كم وكيلو اللحمة؟ سيبك من ده عارف أنه سعر الدكوة هسه ما بقي زي سعر الدكوة زمان؟ عارف رسوم رياض الاطفال سيبك من المدارس والجامعات، عارف قلع الضرس بقي بكم ؟ نهايتو نحنا الفئران في جيوبنا ماتت شوف ليك حل تاني….
هذا الصباح اعذرونا إن كنا سنخبركم بأن عدد الإصابات التي تسبب فيها سلاح الخرطوش على جسد الاستاذ الجامعي الدكتور هاشم ميرغني أكثر من السنوات التي قضاها في مراحل التعليم المختلفة وأن لجنة الاطباء قالت أن في جسد الشهيد 42 أصابة لن نهتف في وجوهكم لا تقتلونا بالسلاح المحرم دولياً فقط بل أوقفوا قتلنا حتي وان كان ذلك عبر مسدس موية نحن شعب يستحق الحياة…

وطبعاً ما ممكن يجي صباح ويمشي دون أن تأتي سيرة الشرق وحوادثه الجديد أن الحادث هذه المرة مرق من البحر عشان يبقي في السكة حديد حيث انحرف قطار عن مساره وانقلب المفرح أنه لا ضحايا . لكن القال منو القصة انتهت هنا ح ندخل تاني البحر عشان نودع الباخرة (دهب) المتوقفة ثلاث سنوات والتي تم بيعها لهنود في تلاتة اسابيع دورت الآن فقط يمكنك أن تذكر الخطوط البحرية السودانية وان تكمل الجملة (لا توجد بواخر)
معليش بس دي أخر حاجة السودان قد يكون الدولة الرائدة فأن تستمر مباراة كرة قدم ليومين دون ان تحرز فيها أهداف ودي ما قصة خيال علمي حصلت جد في مباراة المريخ وحي الوادي نيالا التي لعبت باستاد الخرطوم يومي الجمعة والسبت حيث اضطر الحكم لتأجيلها من اجل اكمال 11 دقيقة عشان الكهرباء قطعت شفت كيف
بالعودة للهاشتاق في عرس الثائر وائل يجيب الرفاق على سؤال ما هي الثورة ؟ بأنها سيرة عريس , وسماعة طبيب , كمنجة للألحان هتاف ونشيد وزغرودة معول في يد مزارع , ميزان لا يعرف تطفيف الكيل في دكان تاجر , طباشيرة أستاذة , غرس , وبذرة , وحصاد محصول ونضم عديل لا فيهو شق ولا طق وقوله لا في وجه طاغية , مسطرين أوسطى ويقين داخل القلوب ان قدامنا الصباح وحتما ح ننتصر عشان نبنيهو

لمزيد من المفالات إضغط علي الرابط

https://hala96.com/category/news/

#أسمعنا_بقلبك | #هلا٩٦ |#بصوتك_قادر | #السودان | #Sudan |#أسمعنا_وسمعنا_صوتك | #Hala96Fm